- Sama breyð 5 krónur bíligari á Skálafjørðinum enn í Havn

Tilvildarlig mynd

Ein lesari hevur sent Vágaportalinum eitt harmaljóð, tí lesarin ber ótta fyri, at tær stóru fyritøkurnar í Havn, gera alt fyri at drepa tað smáa sum roynir at lívga og fjálga í útjaðaranum.

Lesarin, ið helst vil ókennast, skrivar soleiðis og verður skrivið endurgivið í fullari longd til tess ikki at missa ein samanhang:

- Á Skálafjørðin er ein fyritøka, sum rekur bakaravirksemi við Saltangará. Fyritøkan selur eisini bakstur (tó mest rugbreyð og fransktbreyð) til onnur økir, eitt nú til ávísar handlar í Tórshavn, sum kunnu og vilja selja fyri hesa fyritøku.

- Ókent er ikki, at ein bólkur av íslendingum og føroyingum hava lagt seg eftir at eiga og reka nærum alt handilsvirki í Føroyum. Talan er um handlarnar Miklagarður, Bónus og Brotið. Bónus er at finna um alt landið, meðan Miklagarður er í Tórshavn og Brotið við Saltangará. Sama fyritøka eigur eisini bakaríið Mylnan, sum eisini hevur útsølustøð í Tórshavn.

- Tá sama fyritøka er so fyri, at hava egið bakarí, so verða bert bakaravørur frá Mylnuni seldar í teirra fyritøkum. Kanska er tað ikki so løgið í sær sjálvum.

- Tað sum er meiri ivasamt er, at henda sama fyritøka í handlunum Bónus á Glyvrum og Brotinum við Saltangará hava ásett aðrar prísir enn í handlunum í t.d. Tórshavn.

- Keypir tú eitt rugbreyð frá fyritøkuni í Tórshavn, kostar hetta kr. 24.95, men keypir tú eitt sama slag rugbreyð frá hesi fyritøku í Bónus á Glyvrum ella í Brotinum Saltangará, so kostar rugbreyðið kr. 19.95.

- Øll vita ella eiga at vita hví so verður gjørt.

- Stóra fyritøkan í Tórshavn roynir at fáa kappingarneytarnar av vegnum og í hesum føri er tað bakaríið við Saltangará, sum stendur fyri skotum. Hetta bakarí hevur ikki møguleika fyri at selja rugbreyð fyri undirprís og hevur ongan møguleika í hesi ójøvnu og órímiligu kapping. Eingin ivast heldur í, at tá bakaríið við Saltangará er hoknað undan, so verður prisurin á rugbreyði hjá hesi fyritøku settur breyðprísur, sum er galdandi aðrastaðni.

- Úrslitið er bara tá, at fólkið á Skálafjørðinum hava mist sítt bakarí og fleiri fólk sítt arbeiðspláss.

- Júst fyri at umganga ójavna og órættvísa kapping, fingu vit eina løgtingslóg nr. 83 frá 6. juni 1997 um kapping, sum seinast broytt við løgtingslóg nr. 55 frá 16. mai 2006. ì hesi lóg er m.a. ásett í § 13, stk. 2 stendur soleiðis: "Metingin av einum prísi ella vinningi skal gerast við grundarlagi í viðurskiftum í fyritøkum, sum verða rikin á ein tøkniligan og handilsliga forsvarligan hátt. Við ásetanini av einu prísi fyri eina vøru ella tænastu v.m. skal fyritøkan hava fulnað fyri neyðugan kostnað og vinning í mun til vágnaðin fyri framleiðslu og sølu av vøruni ella tænastuni."

- Tað er tí sera áhugavert at fingið upplýst, hvussu breyðprísirnar hjá hesi fyritøku hongur saman.

- Hví er breyðprísurin heilar 5 kr. lægri á tveimum handlum á Skálafjørðinum enn t.d. í Tórshavn.

- Vit gita, at fyritøkan trýstir aðra fyritøku í økinum, so henda ikki hórar undan, skrivar lesarin og spyr at enda: Hvat sigur kappingareftirlitið?

(Vágaportalurin hevur longu sent mál og spurning til Kappingareftirlitið)

Aftur