Advokatur: - Lógin hjá Fólkaflokkin er púra greið

Í Lóg fyri Landsfelag Fólkafloksins, paragraff 12, stendur hvussu floksformaðurin í Fólkaflokkinum verður valdur, og hon er púra greið.

Eingin av teimum, sum Vágaportalurin hevur spurt, og sum hava verið í Fólkaflokkinum í mong ár, klára at miskilja lógina, hvusssu tey so royna.

Vágaportalurin hevur tí eisini spurt ein advokat, eina uttanveltaða rødd, um, hvussu henda lógin skal skiljast, og advokaturin sigur, at hon er púra greið.

- Fyrst stendur soleiðis: "Floksleiðslan velur floksformann eftir tilmæli frá ting- og landsstýrismanning floksins".

- Men tað sum so stendur: "Um meiriluti ikki er fyri tilmælinum á floksleiðslufundi, ger ting- og landsstýrismanning nýtt tilmæli", sigur okkum, at talan fær bert verið um at innstilla ein.

- Hetta er sera greitt í lógini, og tað er púra óneyðugt at gera nakra broyting her, so eg skilji ikki, at skilagóð fólk fáa hetta til ein trupulleika.

- Jørgen Niclasen er tilmæltur til floksleiðsluna, og skal so ein meiriluti í floksleiðsluni velja hann ella biðja um nýtt tilmæli, sigur advokaturin sum ikki hevur hug at vera nevndur, tá ið advokaturin sigur seg ikki velja Fólkaflokkin kortini.

Advokaturin leggur tó afturat, nú Annika Olsen hevur funnist at mannagongdini at velja floksformann, at hon skal kanska meiri hugsa um uppgávuna hjá floksformanninum, tá tað stendur: "Floksformaðurin teknar flokkin í politiskum spurningum og myndar floksins politikk bæði innanfloks og úteftir".

- Hetta hevur hon ikki enn livað upp til og fer tað heldur ongantíð.

§ 12 Floksformaðurin
Floksformaður verður valdur á hvørjum ári í seinasta lagi til landsfundin. Floksleiðslan velur floksformann eftir tilmæli frá ting- og landsstýrismanning floksins.
Um meiriluti ikki er fyri tilmælinum á floksleiðslufundi, ger ting- og landsstýrismanning nýtt tilmæli.
Fyri at verða valdur til floksformann, skal viðkomandi vera løgtings- ella landsstýrisfólk fyri flokkin.
Floksformaðurin teknar flokkin í politiskum spurningum og myndar floksins politikk bæði innanfloks og úteftir.
Floksformaðurin er samstundis formaður í floksleiðsluni.
 

Aftur