Bara 10 av 27 vildu hava Anniku Olsen

Atkvøðugreiðslan í dag, har floksleiðslan skuldi taka støðu til viðmælið frá løgtings- og landsstýrisfólkunum um formann í Fólkaflokkinum, vísti greitt, at floksleiðslan vildi hava Jørgen Niclasen at taka eitt ár afturat sum formaður í Fólkaflokkinum.

17 flokslimir tóku undir við viðmælinum um, at Jørgen Niclasen skal halda fram, og eingin var ímóti.

Hinvegin vóru 10 atkvøður blankar, og hesar atkvøðurnar eru ivaleyst tær atkvøðurnar sum høvdu farið til Anniku Olsen, var hon viðmælt.

Tað vil so við øðrum orðum siga, at tað var ein greiður meiriluti fyri, millum teir 27 floksleiðslu limirnar, teir 17 av teimum, at velja Jørgen Niclasen, meðan bert 10 høvdu stuðlað Anniku Olsen.

Hátturin hjá Fólkaflokkinum at velja formann er ikki ókendur frá fyritøkum, tá ið t.d. orðstýrari skal veljast.

Funnist hevur verið at hesum háttinum, at velja formann, men sambært eini viðmerking frá advokati, so eru reglurnar púra greiðar.

- Fyrst stendur soleiðis: "Floksleiðslan velur floksformann eftir tilmæli frá ting- og landsstýrismanning floksins".

- Men tað sum so stendur: "Um meiriluti ikki er fyri tilmælinum á floksleiðslufundi, ger ting- og landsstýrismanning nýtt tilmæli", sigur okkum, at talan fær bert verið um at innstilla ein.

- Hetta er sera greitt í lógini, og tað er púra óneyðugt at gera nakra broyting her, so eg skilji ikki, at skilagóð fólk fáa hetta til ein trupulleika, segði advokatur við Vágaportalin undan valinum í dag.

Aftur