Beinleiðis frásøgn yvir alnetið

Vit eru nakrir tvøramenn, sum hava valt at varpa meira ljós á ítróttin í oynni. Vit mettu, at flogbóltur og 1. deildar fótbóltur fekk ov lítlan ans í stóru miðlunum, og byrjaðu so í smáum á kvistinum í TB húsinum, við at útvarpa beinleiðis frá síðsta landskappingardystinum í 1. deild, millum TB-B68 í fjør.

Hetta gekk somikið væl, at vit løgdu okkum eftir, eisini at varpa beinleiðis frá flogbólti úr ítróttarhøllini í Trongisvági, tá Eik Ligu liðið hjá TB spælur har.

Mál okkara er at dekka øll ítróttartiltøk í oynni einaferð í framtíðini, men til tað krevst meiri fólk enn tey sum nú eru tilknýtt at átakinum.

Vit hava eisini eina vikuliga sending, sum vit senda sunnukvøld kl. 20. Hesa sending hava vit valt at kalla Ítróttargluggin, og har umtala vit aktuell evnir innan ítróttarheimin her heima og í útheiminum.

Sum nú er hava vit havt sendingar um allar aktuellu ítróttargreinarnar í oynni, og gjørt eina rúgvu av áhugaverdum samrøðum, sum vit hava bandað.

Vit bjóða tykkara lesarum og annars fjepparum hjá lokalu feløgum tykkara, at koma inn á www.tb.fo. Her hoyrir og sær tú beinleiðis frásagnir, og á hendan hátt sleppa tey frá at sita og bíða og onki vita.

Stutt undan dystarbyrjan kemur eitt link á TB heimasíðuna, og við at trýsta á har, kemur man inn á síðuna, har tú bæði sær og hoyrur beinleiðis frásøgn frá flogbólti á hægsta støði.

Eg ivist ikki í, at tað eru fleiri, sum sita spent og bíða, til tey fáa úrslitini at vita, og hesum kunnu vit bøta um, við at bjóða eina ókeypis - og uttan stórvegis hóvasták - tænastu.

Tað hevði glett okkum, og uttan iva mong av tykkum norðingum, um tit hjálptu okkum at varpa ljós á hetta átak.

TB-Studio
Niels Petersen

Ólavur í Beiti tann 28/01/2010 kl. 21:09

Aftur