Edward Fuglø stillar út í atelierinum

Í 2009 tók Edward Fuglø stig til at byggja sær eitt atelier. Hann hevði tá í fleiri ár arbeitt við málningalist og fleiri av málningum hansara vóru  ógvuliga stórir. Fleiri av hesum verkum síggjast í dag á ymsum stovnum kring landið.

Arbeiðsumstøðurnar tá vóru alt annað enn nøktandi við tað at listamaðurin arbeiddi í tveimum rúmum í sínum egna kjallara, og neyðugt varð eisini av og á at leiga høli til gerð av onkrum av teimum størstu verkunum.

Við nýggja atelierinum fekk Edward tað nógv rúmligari, og arbeiðsumstøðurnar eru nú, fyri hann, optimalar. Atelierið er innrætta sum eitt  málaraverkstaður við øllum tí sum hartil hoyrir, nógv veggjapláss, góð ljósviðurskifti o.s.fr. og eru tað, hesi tvey árini, longu framleidd fleiri verk her.

Tá Edward skuldi byggja atelierið, visti hann beinanvegin at bygningurin ikki skuldi verða ein fýrkantaður kassi. Hann teknaði sjálvur ein bygning, sum hann vildi hava skuldi  útstrála nakað kreativt. Harafturat skuldi hann hóska til eldru húsini sum Edward eigur og býr í.

Atelierið endaði við einum skulpturellum formi, ið hevur íblástur úr tí frumnorðurlendska. M.a. eru stiliseraði drekahøvd á bygninginum og nógv er gjørt burturúr at klædningurin er dekorativur.

Edward Fuglø brúkar atelierið sum arbeiðspláss, og tað hevur ikki eina funktión sum gallarí, og hevur tí ikki almennt opið sum so. Tó ganga nógv fólk, serliga útlendingar á hurðina, sum vilja síggja hvussu listamaðurin arbeiðir. Og fólk fáa eitt prát um bygningin og myndirnar.

Í vikuskiftinum, komandi, hevur Edward so sett eina framsýning saman í atelierinum, og er tað sostatt høvi hjá áhugaðum at støkka inn á gólvið.

Aftur