Er hetta gott umboð fyri føroysku lærararfjøldina

Nú havi eg ongantíð verið nakar smásárur maður, so viðvíkjandi mínum persóni ger tað ikki so nógv, men ein viðmerking frá formanninum í Lærarafelagnum undirbyggir bert enn meira mín mistanka um, at happing í skúlunum, er ikki nakað sum næmingarnir hava innført í skúlan.

Fleiri skúlar hava gjørt eitt stórt arbeiði at royna at steðga happingini, og verður einamest fokus sett á næmingin, sum sjálvandi eisini er ein partur av happingini, at næmingar happa hvønn annan.

Bæði úti í heimi, og eisini her heima, hava greinar verið skrivaðar um happing, og har hevur Føroya Lærarafelag sjálvandi, undir fyrrverandi formanninum, Magnusi Tavsen, staðið í front og víst á bæði eitt og annað í tí sambandinum.

Ein formaður eigur altíð at standa í front og vera ein leiðari, og ein formaður eigur eisini at tola at fáa eina viðmerking.

Hetta er ein av lutunum hjá einum leiðara at hann meira og minni gerst ein almennur persónur.

Tí skal ein formaður eisini duga at vanda sær um síni orð og eisini atburð, so hann av sonnum stendur fram sum ein leiðari, og ikki sum eitt spott.

Men tað eru ikki allir formenn sum eru eins, og heldur ikki eins virðiligir formenn sum Magnus Tavsen var tað.

Sum hetta dømi omanfyri er tekin um.

Er hetta umboðandi fyri alla lærarafjøldina í Føroyum? kundu vit spurt.

Taka føroyskir lærarar undir við, at teirra formaður soleiðis úti á Facebook undir sínum profili, happar fólk?

Viðvíkjandi sjálvum lesarabrævinum, sum ein nevndur COM hevur skrivað her á Vágaportalinum, so skal sigast, at viðkomandi ikki sleppur at seta síni lesarabrøv út á Vágaportalin uttanso at Vágaportalurin veit, hvør viðkomandi er. Og tað ger Vágaportalurin sjálvsagt.

Kjakið um hvørt vit skulu hava dulnevnd lesarabrøv ella ikki, er eitt áhugavert kjak, men higartil hevur Vágaportalurin ikki sæð nakra brúkiliga grundgeving fyri ikki at loyva dulnevndum lesarabrøvum. Vit leggja meira dent á tekstin sjálvan enn, hvør skrivað hevur, tvs. innihald kemur framum forvitni.

Hartil skal so eisini sigast, at Com er ikki eitt vágafólk, um tað fær hjálpt teimum, sum illteinkja ávís vágafólk at føða og gøða Vágaportalin við bæði einum og øðrum.

Vágaportalurin røkkur nógv longur enn so, at hann bara er fyri vágafólk.

Vágaportalurin er ein miðil sum verður brúktur av flest øllum føroyingum, eisini føroyingum sum sigla og búgva úti í heimi.

Og Vágaportalurin roynur eisini at geva teimum rúmd, sum av ávísum orsøkum, ikki fáa sett sítt navn undir, men kortini hava eini sjónarmið.

Í roynd og veru eru dulnevnd lesarabrøv ikki øðrvísi enn dulnevndar keldur!

ólavur 

Aftur