Etta James deyð 73 ár

Amerikanska sangarinnan Etta James doyði í dag 73 ára gomul. Hon var serliga kend tí hon megnaði at syngja á ymsan hátt, og aldri vildi verða sett í bás. Hon sang eins væl blues, rhythm & blues, rock’n’ roll, soul, gospel og jazz.

Etta James kom fram miðskeiðis í fimmtiárunum og gjørdist kendi við sangum sum ‘Dance With Me, Henry’, ‘At Last’, ‘Tell Mama’ og helst er kendasti sangurin hennara hin inniligi ‘I'd Rather Go Blind’, sum hon skrivaði og hvíti bretski bluesbólkurin Fleetwood Mac gjørdi kendan í Evropa.

Sangir hjá Ettu James hoyrast javnan í kappingum sum X Factor, har dugnaligir sangarar við góðum stevi royna at gera henni listin eftir við at syngja tvørtur um øll mørk, tað verið seg rhythm & blues ella rock’n’ roll.

Úr stóru skrá hennara er ‘At last’ serliga kendur sum brúdleypssangur í Amerika.

Etta James vann seks Grammy virðislønir og seytjan Blues Music Awards. Hon varð limað inn í Rock and Roll Hall of Fame í 1993, í Blues Hall of Fame í 2001 og Grammy Hall of Fame í 1999 og aftur í 2008.

Heimsins kendasta tónleikablað, Rolling Stone, hevur í einum lista av hundrað teim bestu sangarum nakrantíð, sett Ettu James á eitt 22nda pláss.

Lupe de Leon, umboðsfólk hennara, sigur í tíðindaskrivi í dag at deyðsorsøkin var blóðkrabbi, sum hon hevur stríðst við síðani fyrrárið.

Alt húskið var savnað tá Etta James doyði í Riverside í California í dag.

Aftur