Fakta um makrel

Eisini gloymir Jógvan Jespersen í frágreiðingini at siga hvussu stórur partur av tí sum nótaskipini fiskaðu fór til ídna, men vit vita at í 2010 fór minst 1/3 av góðari matvøru hjá nótaskipinum til ídna, í 2011 var standurin nógv betri, tá fóru 11 % av makralinum sum tey fimm tangaskipini hjá felagnum nótaskip fiskaðu til ídna. 

Eg kann siga at fyri okkara viðkomandi var tað 3,5 % sum fóru til ídna, tað er einki nótaskip sum var lagri, tann lagsti hevði gott 6 %s um fór til ídna, so tað er ikki neyðugt við skipum fyri trý sifraða milliónum fyri at gagnnýta makrelin, tað er bert at hava tað rætta konsepti, tað hava vit prógva.

Sagt verður í frágreiðingini at virði av makrelinum í 2011 sum føroysk skip fiskaðu var 736 milliónir krónur, hvussu man er komin til hetta tali veit eg ikki, men í 2009 tá ið bert nótaskipini fiskaðu og vit høddu avtalu við strandalondini var fiska fyri 216 milliónir krónur og bert 3 % var landa í Føroyum.

Tað var frammi nú ein dagin, tá kringvarpi tosaði við ein sølumann,  hesin metti at prísurin á makreli fór at fella 20 til 30 %.  Sølufólk sum eg havi tosa við, siga at man skal rokna við einari hækking, hettar tí at man vantar ein hægri dollara í ár. Hoyrdi týskvøldi stjóran í Thor siga í Dag&Viku, at teir fingu 9,78 krónur í meðal fyri kilo og er hetta meira enn nakað av nótaskip fekk, so tit hava nokk okkurt at læra.

Eg gjørdi mær tann ómak at ringja til Jógvan Jespersen og bæð hann senda mær frágreiðingina, hetta skuldi hann gerða, men hon er ikki komin enn, eg veit ikki hvat man hevur at goyma.

Jógvan Jespersen segði eisini í fjør,  tá ið makrel kvotan skuldi býtast, at nótaskipini høvdu tillaga seg til tey rættindi teir høvdu. Men tá ið tað var býtt, komu tvey stór skip inn í nótaflotan bert til at fiska makrel, hetta sigur mær so mikið sum, at teir fingu alt ov stóra kvotu í sín part.

Um vit føroyingar áseta okkum somu kvotu í ár sum í 2011, so er nokk til allar, tað er bert at býta køkuna rætt og ikki lata tað verða soleiðis, at summir sita svangir meðan aðrir sita propp mettir og ikki fáa svølt meira.  Heldur ikki skula vit lata útlendingar fiska ígjøgnum føroyskar strámenn.

Við makrel kvøðu.

Suni Jakobsen
Skipari á M/tr Ednu

Aftur