Fekk helst flatskriða av flatskatti

Tað var einaferð tann tíð, tá ið aðrir politikarar ikki sluppu framat tí stóra portalinum hjá Javnaðinum, sum málgagni hjá Javnaðinum, Sosialurin, rekur fyri Føroya Tele.

Og slapst tú ikki framat hesum stóra miðli, ja, so vart tú lost og verjuleysur, tí hetta virkaði eisini so, at hesin kraftarmikli miðil fekk knúst ein sambandsmann, tjóðveldismann, sjálvstýrismann, fólkafloksmann og miðflokkamann niður í sand og øsku til eina og hvørja tíð.

Men tann tíðin er farin.

Nú sleppa allir politikarar framat øðrum stórum miðlum og hava einki at óttast, at teirra meiningar og vísu orð ikki verða hoyrd og lisin av øllum føroyingum bæði úti og heima. Og tað á nátt sum á degi!

Men tað sum síðan er hent, er, at nú verða allir aðrir miðlar lagdir undir at vera líka rotnir og skitnir og andstyggiligir móti Javnaðinum, sum Javnaðarmálgagnini hava verið í mong ár móti øllum øðrum enn javnaðarlimum.

Ella sum orðatakið so væl sigur tað: tjóvurin trýr, at øll stjala.

Men tað gera vit ikki!

Um vikuskiftið hevur Vágaportalurin havt nakrar stuttar stubbar um fólk sum hava verið glað fyri flatskattin og skattalættan, og hetta hevur javnaðartinglimurin Eyðgunn Samuelsen í Klaksvík fingið flatskriða av.

Greinarnar eru ikki meira enn lagdar út á Vágaportalin, so eru skuldsetingarnar buldraðar omanyvir Vágaportalin við ófantaligum illgitingum av øllum handa slagi.

Móðir Eyðgunn, sum hevur eitt so stórt sosialt hjarta og hjartalag, er ill og súr og fortørnað, tí at hon og maðurin hava fingið kanska einar 6000 krónur í skattalætta um mánaðin, meðan ein arbeiðari, sum tjenar einar 5-6 ferðir minni enn løgtingslimurin og fulltrúin tilsamans, kanska bert hevur fingið einar 200 krónur.

Hetta pínir hennara stóra sosiala vinstrahjarta, so hon hevur fingið flatskriða úr stórutá og upp í nøs!

Men okkara ráð eru til løgtingslimin við øllum skattalættanum og skattafríu koyripengunum:

Vælsignaða lat ongan hoyra títt luxusjarm!

Og høvdu tær 62.000 krónurnar frá Klaksvíkar býrað nú ligið í lønarposanum eisini, og undirvísingartímarnir, ja, so var skattalættin tilsamans einar 8.000 krónur.

Tað er frálíkt at ein politikari hevur eina meining og vil hava hana alment fram, men helst skal nakað av tign vera um ein løgtingslim, og meiningarnar liggja á einum eitt sindur hægri støði enn sleyg og slatur og baby- og túnatos.

ólavur

Aftur