Gunvá við Keldu: - Edward valdi sín føðistað og tað eru vit ómetaliga glað fyri

Klaksvíkar kommuna: - Við sínum einastandandi evnum kundi hann valt at farið út í stóru verð og búsett seg í t.d. New York, London ella Paris, og har livað eitt meiri glæsiligt lív! Men hann valdi sín føðistað, og tað eru vit í Klaksvík ómetaliga glað fyri. Edward og hansara list eru eitt sera stórt aktiv fyri okkum í Klaksvík, segði Gunvá við Keldu, borgarstjóri, tá ið hon á tunnilsdegnum 10. desember 2011 beyð vælkomið til opna atelierið hjá Edwardi Fuglø, listamanni.

Í vælkomurøðu sínari segði Gunvá við Keldu, borgarstjóri, soleiðis:

Í dag er ein serstakur dagur í Klaksvík, nú ein av fremstu listafólkum okkara í Føroyum, Edward Fuglø, sýnir almenninginum sítt arbeiðspláss, kallað atelier, har øll, sum hava hug, hava møguleika at vitja. Atelierið verður opið í dag frá kl. 10 til 20 og í morgin, sunnudagin, frá kl. 14 til 18. Tað eru um 20 málningar at síggja hesar dagar.

Á skránni í dag verður eisini ein áhugaverd listasamrøða millum Edward sjálvan og stjóran á Listasavni Føroya, Nils Ohrt, har ymisk listaverk hjá Edwardi verða víst á uppvørpu, og har verkini verða lýst í samrøðuni ímillum teir báðar.

Óivað hava fólk ymiskar spurningar og verður høvi til at fáa svar uppá hesar.

Stórt aktiv fyri Klaksvík
Edward Fuglø er klaksvíkingur og listamaður, og hevur hann útbúgving frá Danmarks Designskole. Hann flutti til Danmarkar í 1985 og flutti heimaftur í 1991, tá ið hann valdi at búseta seg aftur í Klaksvík.

Við sínum einastandandi evnum kundi hann valt at farið út í stóru verð og búsett seg í t.d. New York, London ella Paris, og har liva eitt meiri glæsiligt lív! Men hann valdi sín føðistað, og tað eru vit í Klaksvík ómetaliga glað fyri. Edward og hansara list eru eitt sera stórt aktiv fyri okkum í Klaksvík!

Vekir ans úti í heimi
Edward er ikki bara kendur listamaður her heima. Hann hevur verið við í nógvum uttan í heimi.

Eitt nú var ein stórsligin atltjóða framsýning í Wien, á Leopold Museum, í mai mánað í 2008, har ein av hansara kendu málningum var valdur út sum vørumerki fyri framsýningina og at standa á forsíðuni á faldaranum, sum marknaðarførdi sýningina. Verkini hjá Edwardi vaktu eisini ans og fingu eisini sera nógva umrøðu har.

Eisini hevur Edward verið við í sambandi við gerð av pallmyndum, frímerkjum, jólamerkjum og ymiskum bókum!

Í bókum hevur hann serliga myndprýtt, men seinastu tíðina eru 3 barnabøkur, og tann fjórða er á veg, har Edward bæði hevur myndprýtt og skrivað tekstin til bøkurnar.

Hugtekur vitjandi
Hann hevur eisini fingið nógvar ymiskar heiðurslønir, har nevnast kann bæði týskar og kinesiskar.

Í 1995 fekk hann barnbókaheiðursløn Tórshavnar Býráðs, og í 2001 fekk hann Nordisk Børnebogspris. Henda prís hava bert tveir aðrir føroyingar fingið! Ólavur Michelsen í 1991 og Marjun Syderbø Kjelnæs í ár.

Tá ið vit hava gestir í kommununi, so eru fólk altíð ógvuliga hugtikin av stóra, vakra málninginum “Culture Club” hjá Edwardi, sum hongur í Miðlan, og hevur hann verið orsøk til nógvar góðar samrøður, og tað sama eisini serian av málningum, sum eita “Hooked”, “Seamonster” og “Consumed”, sum lýsa fiskivinnuna og hvussu vit liva, á annarleiðis hátt.

Takk
Góði Edward! Eg skal vegna Klaksvíkar býráð bera tær eina tøkk fyri, at tú hetta vikuskiftið loyvir okkum øllum inn at síggja títt arbeiðspláss. Hetta er annarleiðis og spennandi at síggja.

Eisini takk fyri at tú valdi at flyta aftur til Klaksvíkar í 1991.

Vit vita øll, at tað er ikki eitt lætt lív av liva sum listafólk í Føroyum, tá ið hugsað verður um, at listafólk alla tíðina skulu bjóða sær sjálvum av og royna nýggjar leiðir. Rokni heldur ikki við at tað er lætt fíggjarliga.

Hjartaliga tillukku við hesum snotiliga atelieri, ið tú sjálvur stóð fyri at byggja, og sum stóð liðugt í 2009.

Við hesum fáu orðum vil eg vegna listamannin bjóða tykkum hjartaliga vælkomin at vitja atelierið hjá Edward Fuglø!

 

Aftur