Hon er avloysarin hjá Katrini Olsen

Róðrarfelagið Knørrur: Tann fyri føroyska kapprógving so spennandi tíðin við knørrakvinnuni Katrini Olsen og Juliane Elander Rasmussen er liðug. Katrin, sum er vorðin lækni, fer nú at savna seg um læknayrkið. Tað skrivar Róðrarfelagið Knørrur.

Tí hevði bátsfelagin hjá Katrini, Juliane Elander Rasmussen. brúk fyri einum avloysara, og tað kann ikki vera hvør sum helst, tá man bestillur billett til OL.

Avloysarin
Avloysarin er funnin og eitur Anne Lolk, og hon er eingin hvølpur, tí sum fjórfaldur heimsmeistari í maratonrógving og eini glitrandi mongd av altjóða heiðursmerkjum í fikkuni má hon sigast at vera ein ógvuliga virðiligur og kompetentur avloysari.

Men Anne hevur ongantíð róð í báti, sum vit kenna tað. Hon hevur nevniliga vunnið øll síni heiðursmerki í kajakkrógving, og umskiftið at rógva við rygginum fram er sjálvandi eitt stórt lop at taka, kropsliga sjálvandi, men ikki minst mentalt.

Var givin
Anne hevði annars boðað frá, at hon var givin at rógva, men tá ið Juliane ringdi til hennara og beyð henni tóma sessin hjá Katrini og harvið kjansin at sleppa til OL í London 2012, tók hon av, tí tann avbjóðingin var ov stór og spennandi at siga nei til.

Upplæringin gongur eisini væl, tí Anne sigur, at Juliane er ein góður og tolin lærumeistari, og hon hevur eina góða kenslu av at rógva saman við henni.

...men Juliane skal líka eiga eitt barn fyrst
Avbjóðingin hjá Anne er helst ovurstór, men hon er ikki minni hjá Juliane, sum skal eiga eitt barn mitt í fyrireikingunum, og ein partur av venjingini hjá Anne fer tí fram í singulskullara, inntil Juliane tørnar til aftur, væntandi fyrst í 2011.

Málið er London 2012
Tað er í øllum førum knallhart at trena til OL hjá bæði Anne og Juliane – onnur nýggj, hin tvílívað – men tær finna væl út av tí saman og hava sett sær sum avgjørt mál at kvalifisera seg til OL í London.

Lesið á heimasíðuni hjá Róðrarfelagnum Knørri. TRÝST HER

Ólavur í Beiti tann 09/01/2010 kl. 22:12

Aftur