Hvar var Virgar Dalsgaard í 60'unum og 70'unum?

Ikki kenni eg Virgar Dalsgaard, men meti hann við sínum brockmanslestri og orðingum hevur følt seg uttan fyri alt og øll í Keypmannahavn seinru helvt av 20'øld.

Skal tó rætta beinleiðis ósannandi - tá eg sjálvur tók lut í føroyska mentanarlívinum í Keypmannahavn hetta tiðarskeið - og serstakliga í rúmligu felagshølunum í St.Kongensgade, sum landsstýrið fekk til vega tí umstøðurnar í Skt. Pedersstræde vóru smáar og ikki nøktandi.

Í nýggju og rúmligu hølunum góvust umstøður til frálæru í føroyskum fyri børn, ið annars ikki høvdu henda møguleika. Foreldur brúktu sína frítíð til hetta arbeið, og skal serstak nevnast ein kvinna, nevniliga Heidi Djurhuus, sála, ið legði alla orku í innrætting og leikur, at bjóða føroyskan viðskera, óføran blískap, og at her var hugnaligt at koma fyri tað stóra tal av ungum og eldri, sum í stóran stíl hittust í St.Kongensgade.

At Petur Andrew Petersen bleiv kroystur út, er beinleiðis ósatt. Hann hevði eitt skrivstovuhøli, ið landsstýrið hevði flýggja honum til nýtslu, men hevði hann ikki serstakan tørv á hesum, og tí stóð hølið mestan óbrúkt.

Annað evnið, ið Virgar Dalsgaard eisini fer fullkomuliga skeivur í, er blaðið Oyggjaskeggi. Her var eg nøkur ár og gav eina hond við í arbeiðnum at fáa blaðið sett upp, skrivað nakrar greinar, tekningar, og eisini skriva ummæli frá teim nógvu mentanartiltøkunum, ið skipað vóru m.a. málningaframsýningar, barnasjónleikir, dukusjónleikir, fyrilestrar og tónleikaframførðslur o.a.

Oyggjaskeggi var ikki eitt miðvíst marxistisk ella maoistiskt tíðindablað hjá Klæminti Olsen, sála. Her luttóku øll av reinum áhuga fyri einum livandi føroyskum mentanarlívið, og eingin ávís politisk strategi lá nakrar staðir í blaðnum.

At ung lesandi settu sín dám á blaðið - í hæddini av sonevnda ungdómsuppreistrinum - er ein heilt onnur og fult skillig støða, ið húðarskúgvar Virgars allarhelst ikki kundu rúma.

Spell at Virgar hevur gloymt føroyska útvarpið, skipað undir felags kringvarpinum Sokkelund Radio, ið grønlendingar í sínum útvarpi eisini fingu stórt gang av.

Má siga tað er nógv fyri at lesa, at fólk, ið í síni frítíð løgdu stóra orku í at halda felags mentanarlív føroyinga í Keypmannahavn livandi og virki, og sum nú eru undir grønu torvur, nú skulu hunddálkast av Virgari.

Eg biði ikki um eitt svar, men kundi væl hugsa mær at vita hvar Virgar Dalsgaard var staddur í 60'unum, 70'unum og upp til miðjan 80'ini.

Vit, ið vóru úttanlands hetta tíðarskeið, liva nú í 21'øld.

Tíðin er ein onnur, men sýnist sum Virgar enn leitar eftir gomlum og farnum gøtum, har eingin gongur meira.

Gamlir súrir og gronutir menn, verður sagt av og á.

Kári Thomsen

Aftur