Hvirlur settu seks føroysk innandura met í Íslandi farna vikuskiftið

Hvirlan.fo: Fyri hálvum øðrum ári síðan gjørdist Øssur Debes Eiriksfoss fyrsti føroyingur, ið leyp longur enn 13 m í trýstøkk. Síðsta vikuskiftið gjørdist hann eisini fyrsti føroyingur, ið leyp longur enn 14 metrar í somu grein.

Hetta var tá Øssur leyp 14,05 m í stóru innandura kappingini Stórmót ÍR í Reykjavík. Hesaferð hevði Øssur lítlan skaða í fótinum og valdi tí at gevast eftir tvey av seks umførum í kappingini. Tað vísti seg tó at teir 14,05 m vóru nóg mikið til at Øssur fekk gullheiðursmerki fyri at vinna kappingina.

Øssur setti enn eitt føroyskt innandura met í Íslandi. Tað var tá hann leyp 190 cm í hæddarlopi tveir tímar eftir trýstøkk kappingina. Hann átti sjálvur gamla metið, ið var 180 cm.

Hjá kvinnunum vóru fýra føroysk innandura met sett í Reykjavík. Tað mest merkisverda við hesum metunum er, at tann elsta, sum setti met, var 14 ára gamla Edna Maria Debes, ið leyp 9,24 m í trýstøkk.

13 ára gamla Marita Káradóttir Petersen bøtti um metini í hæddarlopi og longdarlopi. Meti í hæddarlop er nú 1,40 m, ið er tað sama sum uttandura metið, meðan metið í longdarlopi er 4,15 m.

Yngsta Hvirlan, sum setti føroyskt met í vikuskiftinum, var tann einans 12 ára gamla Tinna Berg Jørgensen, ið skar 0,4 sek av gamla metinum, tá hon vann sær eitt broncumerki á 60 m teininum.

Viðmerkjast kann at Tinna leyp 4,35 m í longdarlopi, men av tí at hon leyp frá zonu, tvs at mált var harfrá hon leyp, heldur enn einum føstum planka, so telur tað ikki sum met.

Aftur