Jógvan Helgi Hansen: - Tað var bara tilvildin

Fyri knøppum 4 árum síðani fór Jógvan Helgi Hansen at taka myndir fyri Vágaportalin, og uttan at taka munnin ov fullan, so hava myndirnar hjá honum verið stak góðar og lýsandi. Ein sonn frægd hjá okkum lesarum og njótarum.

At byrja við, var myndatólið hjá myndamanninum ikki tað nýggjasta Nikon tólið, men í fjør keypti hann eitt rættiliga gott Nikon myndatól, sum táttar upp móti teimum 50.000 krónunum.

Tá gjørdist góðskan á myndunum eisini eitt vet, ella gott tað, betri, men tað er nú eisini týðandi at hava hugin at taka myndir og finna motivir, tá ið tú skalt gera teg galdandi sum myndamaður.

Tann hugin hevur Jógvan Helgi sum fáur, og eru vit á Vágaportalinum tí sera fegnir um tað samstarv sum bara hevur ment seg, tóat myndamaðurin er burturi eina hálvu av árinum.

Einar seks mánaðir kokkast hann umborð á Vesturvón, og einar seks mánaðir kokkast hann fyri øllum Føroya fólki.

Í gjárkvøldið, ja, helst í allan gjár, var Jógvan Helgi nakað spentur, um myndin fór at vinna steyp, tí hann var upp móti sínum meistara, Jens Chr. Vang, sum hevði tríggjar myndir móti tí einu.

Tóat lærusveinurin vann á meistaranum í hesi fyrstu kappingini, at ársins mynd skuldi veljast millum fjølmiðlafólk, so fær meistarin ugga seg við, at okkurt hevur lærusveinurin lært, tá ið ein mynd hjá honum vinnur.

Tá ið tíðindini stóðu at lesa á Vágaportalinum, at ársins mynd 2011 var kosin, var Jógvan Helgi skjótur at ringja úr Barentshavinum.

- Handa myndin er tikin av tilvild, sigur Jógvan Helgi.

- Ætlanin var, at eg skuldi taka nakrar myndir, meðan teir asfalteraðu nýggju flogbreytina, men júst í tí løtu kom eitt flogfar hjá Atlantic, sum eg var har.

- So vit kunna siga, at eg var á røttum stað, rætta tíð, sigur Jógvan Helgi.

Hugaligur sum hann altíð er, at finna næstu myndina, so endar hann við hesum orðum:

- Ná, nú má eg so fara at hugsa um at fáa næstu myndina til kappingina í ár.

Tað var felagið Føroysk Miðlafólk, ið stóð fyri tiltakinum, sum Finnur Jensen legði til rættis. Fráfarandi formaður í felagnum er Georg L. Petersen og nývaldur formaður er Ingrid Bjarnastein.

Fyri jól valdi nevndin eina óhefta faknevnd at taka dagar ímillum innkomnu uppskotini: Enna Garðshorn Mikkelsen, Tróndur Djurhuus, Ingi Rasmussen og Birgir Kruse.

Til Ársins mynd 2011 komu eini 30 uppskot inn.

ólavur

LES MEIRA HER OG FLEIRI MYNDIR

Aftur