Moldvarp Føroya: Sjúkt

Eg fari ikki at siga, at eg ikki var spentur at síggja hesa sendingina, tí so lúgvi eg.

Brellbitin, sum hevur verið vístur um hesa sending, hevur verið sera lokkandi. Mær dámdi hann væl, tí hann var ótrúliga væl spældur. Hetta stutta brell, segði nógv og lýsti væl tað, sum eg kanska helt, at sendingin fór at vera um, stuttligar føroyskar týpur við stuttligum føroyskum skemti og gaman.

Men gakk á vestfall, verri skrambul havi eg ikki sæð á ævini, og eg meti meg hava sæð nógv. Gelt fyri alt sum eitur humor og fornuft!

So stutt fái eg sagt tað.

At Kringvarpið troystar sær at vísa slíkt blasfemiskt og beinleiðis útspillandi turrgelt moldmøsn, er enn eitt gott prógv um, at hvørki leiðsla ella sjónleikarar í Føroyum duga at skapa nakað upprunaligt, men koppa tí á til at spilla okkurt út ístaðin fyri.

Tað ber ikki til at gera eina sending í Føroyum uttan so vit válka okkum í sex, eiðum og veð og forbannilsi og so blasfemiskari oyðing!

Tað gekk sum ein reyð æðr gjøgnum sendingina, at tað er nýggja samgongan sum skal svínast til og at Miðflokkurin skal vera drívkraftin til tað.

Helst eru allir sjónleikarar vinstraboygdir og skula nú hevna seg, at vinstravongurin ikki vann valið. Tað er helst æðrin í hesi blasfemisku og sjúku satiru sum Moldvarpið var.

Vinstravongurin fekk frið og kirkjan fekk frið!

At skapa nakað sum føroyingurin fær sitið og flent at og stuttleika sær við aftaná, tað dugur Kringvarpið ikki. Tað duga sjónleikararnir í Moldvarpinum heldur ikki.

Tó so skal eg siga, at ein spælari, sum fekk meg at flenna, og eisini bert tá, var Osvald. Hann spældi framúr væl, og eg hómaði at nú fór okkurrt skemtiligt at koma, men so mátti hetta vendast í ófólkaligan ruðuleika og kaos. Fyriskipararnir megnaðu ikki, at geva hesi seansu ein brúkligan enda.

Vælsignaðir sjónleikarar, sum eru í sendingini Moldvarp: Gevist, meðan tíð er!

- Sjónleikarahús og sjónvarp eru hvør sítt.

ólavur

Aftur