Nógv harðari revsing - skuldu mist fiskiloyvi í mánaðir

Fiskiveiðieftirlitið hevur kannað trolarar nú í eina tíð, og úrslitið frá kanningunum er skakandi. Kanningarnar hava víst at eini 70% er ungfiskur, og hetta hevur fingið ein uppilagstan at ringja til Vágaportalin og skjóta upp, at revsingin fyri at oyða okkara stovnar, t.d. upsastovnin, eigur at verða nógv harðari, enn hon er í dag.

- Tíggju dagar muna einki, hvørki til ella frá, tað er sum at sletta vatn á gás, og eigur revsingin at gerast upp í mánaðir, sigur uppilagsti sjómaðurin.

- Ongantíð betri um skipið misti fiskiloyvið. Sum vit hava sæð tað at matstovur missa skeinkiloyvið, tað sama átti at verið galdandi fyri skip.

- Umsitur tú ikki títt loyvi við skili og við ábyrgd, jamen, so skal tað takast frá tær, tí hetta er ikki nakað nýtt, hetta er ein afturvendandi trupulleiki, at somu skip verða tikin og tey skíta á hesar 10 dagarnar.

Víðari sigur tann uppilagst, at hann heldur at eftirlitis myndugleikarnir hava alt ov veikan myndugleika.

- Myndugleikin í kunngerðini um serlig tiltøk um ungfisk frá mars 1993, eigur at herðast munandi, tí eftirlitismyndugleikin hevur alt ov fá amboð og tey muna lítið og einki, sigur sjómaðurin, sum eisini leggur upp til, at vit fáa eitt kjak um hetta sum skjótast, áðrenn alt verður oytt av ábyrgdarleysum skiparum og skipum.

- Tosað verður um, at útlendingar fara avstað við okkara tilfeingi, men eg haldi at føroyingar eru ringastir móti sær sjálvum.

Aftur