Okkara børn: Tvørfakligt samstarv er vegurin

NÁM: Í bókini “Rura. Rørslumenning og sansaskipan” hevur Þóra Þóroddsdóttir kannað føroysk børn, ið hava trupulleikar við sansaskipanini. Á altjóða fakmáli verður sansaskipan nevnd sansaintegration. Integration merkir, at heild verður myndað, men í hesum høpi verður tað týtt sum skipan, tað øvugta av ruðuleika.

- Orðið er lætt á tunguni og greitt í sær sjálvum, men børnini og trupulleikar teirra eru fløktir og fjølbroyttir. Tí nýti eg meginpartin av bókini til at lýsa hesi børn, hvat bagir, og hvussu trupulleikin forðar í dagligum lívi og spæli. Í bókini nevni eg tey sansaskipanarbørn, men kalli tey eisini “okkara børn”, sigur Þóra.

- Her í Føroyum eru fleiri hundrað av okkara børnum, sum eru sansaskipanarbørn, men bert nøkur fá við greiningini MBD/DAMP/ADHD. Eg kenni og havi kannað flest teirra, og tey hava øll trupla sansaskipan og tey eyðkenni, ið av tí fylgja. Tó bregða tey frá, við tað at atburðartrupulleikarnir eru størri, og tað er ikki samsvar millum stigið av sansaskipanartrupulleikum, og hvussu stórir atferðartrupulleikarnir eru.

MBD/DAMP/ADHD-børnunum tørvar tvørfakliga hjálp, og tey hava fyrst og fremst hjálp frá sálarfrøðingi og serlig námsfrøðitiltøk fyri neyðini. Sjálvsagt er eisini at menna sansaskipanina, men tað má vera í aðru syftu og í samstarvi við ein sálarfrøðing. Mínar royndir at arbeiða við teimum kropsliga eru, at rørslur og sansar taka seg fram, men atburðurin, ella hvussu barnið hevur tað, broytist ikki, fyrr enn farið verður í holt við at viðgera tvørfakliga.

Evnið varð umrøtt í morgunsendingini í Útvarpinum hósdagin 5. januar í 2012. Myndina av Þóru tók Jákup Magnussen, vertur í útvarpssendingini.

Føroya Skúlabókagrunnur, núverandi Nám, gav í 2010 út aðru broyttu útgávu av bókini “Rura. Rørslumenning og sansaskipan”. Bókin er á goymslu hjá Námi.

Aftur