Ótrúlig doktaraferð til Mykinesar

Í bókaverkinum Vestmanna søga, sum júst er komið, er ein ótrúlig søga um eina doktaraferð til Mykinesar.

Fyri hundrað árum síðani røkti vestmannalæknin bæði Norðstreymoy, Vágar og mangan eysturoyarbygdirnar í Sundalagnum.

Sorinskrivarin Christian Helms hevur í tíðarritinum Atlanten í 1915-17 skrivað um hesa hending sum eitt dømi um, hvat føroyingar kunnu útinna, tá ið neyðin er størst.

Helms nevnir ikki, hvør lækni var í Vestmanna, tá ið hendingin fór fram, men Helgi Jacobsen, sum hevur skrivað Vestmanna søgu, heldur at hetta má hava verið onkuntíð ímillum 1885 og 1917.

Ein maður í Mykinesi hevði løstað seg sera meint. Mykinesmenn skuldu draga ein bát longri niðan undir bakkan, tí hann øtlaði veðrið, og uppgangurin var vaksin. Men menninir mistu bátin, sum kom á ein mann, so hann lamløstaðist.

Í Mykinesi er bara ein lending, á suðursíðuni, sum ikki kann brúkast, tá ið hann er lágur ella vestligur í ættini. Frá bygdini hevjar oyggin seg javnt uppeftir í ein norðan nakrar hundrað føtur upp, haðan brattar líðir síðan taka seg niður móti bakkanum.

Á hesum norðurendanum er eittans stað, har bátur kann leggja at, men mykinesmenn høvdu hvørki neyst ella bát har.

Alneyðugt var at fáa hendur á lækna til skadda mannin, men hetta tóktist ómøguligt. Eingin var telefonin, og heldur ikki bar til at senda fjarrit.

Mykinesmenn gjørdu tað ómøguliga. Teir drógu ein bát allan vegin úr bygdini gjøgnum hagan móti brattanum á norðursíðuni, gjørdu enda á bátin aftan og framman, settu tveir menn í bátin, so teir kundu halda bátin frá berginum og sigu síðan bátin niður.

Seks mans sigu síðan seg sjálvar niður við línuni, og allir átta menninir róðu til Sørvágs.

Komnir til Sørvágs rann tann skjótasti av monnunum eftir fjøllunum til Oyrargjáar, har hann setti bát út og róði yvir um sundið til Vestmanna.

Har fekk hann fatur á læknanum, róði yvir aftur á Oyrargjógv, haðan teir báðir gingu til Sørvágs, róðu um Mykinesfjørð við áttamannafarinum og settu mannin á land í Mykinesi á somu lending á norðurendanum, haðan teir tóku seg upp og gingu til bygdar.

Maðurin, sum fór til Vestmanna eftir læknanum, segði sjálvur hendingina fyri Helms, reypaði sum so ikki av hendingini og viðgekk, at hann helst ongantíð hevði gjørt tað sama aftur.

Nógv samstarv hevur verið millum Vágar og Vestmanna, ikki minst tá Kongligi handilin var í Vestmanna.

Fleiri vágafólk handlaðu seinni í Vestmanna, teirra millum Rasmus Niclasen, Godtfred Joensen og Marianna Nielsen.

Øll hesi eru umrødd í Vestmanna søgu.
 

Aftur