Premier League: Arsenal snávaði

Aston Villa - QPR 2-2
0-1: Cissé, 12
0-2: Warnock (sjálvmál), 28
1-2: Bent, 45
2-2: N'Zogbia, 79

Queens Park Rangers keypti óført í handilsvindeyganum í januar og tríggir teir nýggjastu leikararnir, Nedum Onouha (komin úr Manchester City), Taye Taiwo (leigaður úr AC Milan) og Djibril Cissé (keyptur úr Lazio) byrjaðu allir inni. Tað var Djibril Cissé, sum beinanvegin staðfesti sína afturvendan til enskan fótbólt, tá hann í 12. minutti legði gestirnar á odda. Við einum sjálvmáli frá Warnock kom QPR fram um 0-2, men heimaliðið megnaði at vinna tað inn aftur og bjarga sær javnleik. Tað vóru Darren Bent og Charles N'Zogbia, ið syrgdu fyri tí eina stignum.




Blackburn - Newcastle 0-2
0-1: Dann (sjálvmál), 12
0-2: Obertan, 90+2

Við einum framúr góðum útisigri móti Blackburn, vann Newcastle seg upp á 5. plássið og er tí væl og virðiliga við í dystinum um 4. plássið. Blackburn harafturímóti liggur enn og rótast undir niðurflytingarstrikuni, men í dag átti tað kanska at verið øðrvísi. Heimaliðið var omaná tað mesta av dystinum, men við einum sjálvmáli og einum máli í yvirtíðini, fór Newcastle avstað við øllum.




Bolton - Arsenal 0-0

Arsenal skuldi hava stig á útivølli móti Bolton, skuldu teir koma inn aftur í dystin um fjórða plássið. Eftir ósigurin á heimavølli móti Manchester United seinasta umfar, var neyðugt við einum góðum úrsliti. Bolton klóraði seg upp um niðurflytingarstrikuna, og vónin var, at eitt gott úrslit móti Arsenal, kundi førka liðið enn longri fram, men dysturin endaði við javnleiki. Tað er heimaliðið helst fegnari um, meðan Arsenal hinveg kann takka stong og brendum møguleikum fyri, at meiri ikki spurdist burtur úr. Javnleikurin merkir, at heimaliðið heldur seg omanfyri strikuna, meðan Arsenal er dottið niður á 7. plássið.




Fulham - West Brom 1-1
1-0: Dempsey, 69
1-1: Tchoyi, 82

Við einum máli seint í dystinum, syrgdi Somen Tchoyi fyri, at West Bromwich fekk tað eina stigið. Fulham kom á odda miðskeiðis í øðrum hálvleiki, tá Clint Dempsey skoraði. Heimaliðið hevði bóltin meiri, meðan tað var javnt býti við møguleikum, tó at heimaliðið helst átti at fingið meiri burtur úr. Nýggi áleyparin, Pavel Pogrebnyak, sum varð keyptur úr Stuttgart, var ikki við, og merkti tað kanska heimaliðið, at tunt var í álopspartinum. Javnleikurin merkir, at liðini enn liggja niðarlaga á talvuni. Fulham er á 13. plássi. Komandi dysturin hjá Fulham verður á Etihad móti Manchester City, sum skal reisa seg eftir ósigurin á Everton. West Bromwich liggur á 15. plássi, men hevur 8 stig fleiri enn liðini undir strikuni, og skuldi tí ligið heilt hampiliga væl fyri.




Sunderland - Norwich 3-0
1-0: Campbell, 21
2-0: Sessegnon, 28
3-0: Ayala (sjálvmál), 54

Sunderland er rættiliga komið fyri seg, eftir at Martin O'Neill tók eftir Steve Bruce. Ein tryggur heimasigur ímóti Norwich merkir, at liðið fór upp um Stoke á 8. plássi, men enn eru 7 stig upp til Arsenal á 7. plássið, so teinurin upp til tey plássini er helst ov stórur. Fraizer Campbell sum hevur verið skaddur tað mesta av árinum legði heimaliðið á odda. Besti leikarin hjá Sunderland hetta kappingarárið, Stephane Sessegnon, økti um munin stutt eftir. Í øðrum hálvleiki gjørdist støðan 3-0 og varð málið tilskrivað Daniel Ayala. Norwich liggur á 11. plássi og er 11 stig frá niðurflytingarstrikuni og skuldi tað gingið øgiliga illa seinastu 15 dystirnar um tað verður søplað burtur.

Støðan:

1	Manchester City	23	17	3	3	60-19	54
2	Manchester United	23	17	3	3	56-21	54
3	Tottenham	23	15	4	4	44-25	49
4	Chelsea	23	12	6	5	41-26	42
5	Newcastle	23	11	6	6	34-30	39
6	Liverpool	23	10	8	5	28-21	38
7	Arsenal	23	11	4	8	39-33	37
8	Sunderland	23	8	6	9	32-24	30
9	Stoke	23	8	6	9	23-35	30
10	Everton	23	8	5	10	23-26	29
11	Norwich	23	7	8	8	32-39	29
12	Aston Villa	23	6	10	7	28-31	28
13	Fulham	23	6	9	8	29-32	27
14	Swansea	23	6	9	8	24-28	27
15	West Bromwich	23	7	5	11	23-32	26
16	Queens Park Rangers	23	5	6	12	24-39	21
17	Bolton	23	6	2	15	28-47	20
18	Blackburn	23	4	6	13	33-47	18
19	Wolverhampton	23	4	6	13	25-43	18
20	Wigan	23	3	6	14	20-48	15

Talva: bold.dk

Komandi dystir:

4/2
13.00 Arsenal - Blackburn
15.00 Norwich - Bolton
15.00 QPR - Wolves
15.00 Stoke - Sunderland
15.00 West Brom - Swansea
15.00 Wigan - Everton
17.30 Manchester C - Fulham

5/2
13.30 Newcastle - Aston Villa
16.00 Chelsea - Manchester U

6/2
20.00 Liverpool - Tottenham

Aftur