Rætting til illan fuglfirðing

Eg skal ikki gera stórvegis viðmerkingar til eitt lesarabræv hjá einum lærara ella pedelli í Fuglafirði, har viðkomandi við- og niðurgerð Vágaportalin í sambandi við eina grein hjá Poul Michelsen, mínum góða vini.

Fuglfirðingurin Jóhan Heri Joensen, sum skrivað hevur lesarabrævið, sigur, at greinin er slettað av Vágaportalinum, so løgd út aftur, fyri síðan at verða sletta aftur.

Rætt er sum Jóhan Heri Joensen sigur, at hann ringdi til mín, har hann m.a. vísti á, at hann hevði nógv størri teldukunnleika enn eg.

Tað fær so væl verið, at so er, men hvussu stórur hansara telduførleiki er, so er tað ikki satt sum hansara telda vísur, tí greinin hjá Poul Michelsen er ongantíð enn farin av Vágaportalinum, men stendur við sama dato og somu tíð, sum tá ið hon upprunaliga var løgd út.

Um so var, at hon hevði havt eina "ping-pong" gongd á Vágaportalinum, so hevði tíð og dato verið broytt, tá ið hon er løgd út.

Poul Michelsen sendi greinina til Vágaportalin klokkan 16.49 tann 30. desember 2011, og klokkan 17.16 var hon løgd út á Vágaportalin eisini 30. desember 2011, og har hevur hon ligið síðani.

TRÝST HER

Eg skilji ikki rættiliga atfinningarnar hjá Jóhan Hera Joensen, tí tað stendur ongastaðni á Vágaportalinum, at Vágaportalurin IKKI er politiskur. Heldur ikki stendur nakrastaðni á Vágaportalinum, at Vágaportalurin ER politiskur!

Aðrar viðmerkingar havi eg ikki til lesarabrævið hjá áðurnevnda lærara ella pedelli í Fuglafirði, og tað nyttar neyvan, tá ið telduførleikin hjá viðkomandi er á tí støði sum hann er.

ólavur

Aftur