Slaka fyri Føroyum og Íslandi

Sambært norska blaðnum Fiskaren, so biðja norskir reiðarar Norra og ES um, at tey standa stinn móti Føroyum og Íslandi. Undir samráðingarumfarinum sum var í Írlandi í desember, var ES sinnað at geva Íslandi 6,5 prosent av makrelkvotuni og Føroyum 7,5 prosent, tilsamans 14 prosent.

Og sambært Fiskaren, so góðtók norski fiskimálaráðharrin Lisbeth Berg-Hansen hesa øking.

Men tá ið tað kom fram, so settu feløgini seg í Norra í samband við fiskimálaráðharran. Eisini Jonas Gahr Støre og LO-sjefurin Roar Flåthen gjørdu tað.

Ísland segði nei takk til tilboðið uppá 14 prosent, og eftir tí sum norska blaðið skilir, so verður nú arbeitt við, at Føroyar og Ísland fáa tilsamans 16 prosent.

Og norðmenn eru hart ímóti, at føroyingar og íslendingar fáa so nógv. Teir hava givið Berg-Hansen greið boð um at Norra skal í mesta lagi geva 4 prosent til Íslands og 7 prosent til Føroyar.

Við Fiskaren sigur Inge Halstensen, sum er við í norsku samráðingarnevndini, at norskir fiskarar eru ræddir fyri at ES fer at lata seg trýsta av Íslandi til at fáa ein størri part, til tess at gera samráðingarnar um limaskap í ES lættari.

Í eini samtykt siga norsku reiðararnir, at teir góðtaka ikki, at ábyrgdarfullir fiskarar í Norra og ES skulu gjalda fyri ein ikki góðtakandi fiskiskap í Føroyum og Íslandi.

Aftur