Stovnandi aðalfundur hjá stuðlafelagnum hjá Heilbrigdi

Fundurin verður hóskvøldið 9. februar kl. 19.00 í Listaskálanum, Gundadalsvegur 9 í Tórshavn.

Umframt sjálvan aðalfundin verður áhugaverdur fyrilestur um tað góða lívið, sum Niclas Heri Jákupsson heldur. Høvi verður eisini at síggja Listaskálan og fáa frágreiðing um listina frá kønum fólki.

Høvuðsendamálið hjá felagnum er at stuðla undir familjum hjá rúsevnismisnýtarum sum hava verið í viðgerð, so tey kunnu koma víðari við lívinum. Hetta verður gjørt við fyrilestrum, útferðum, veitslum og øðrum áhugaverdum tiltøkum sum limirnar ynskja.

Eisini er ætlanin, at felagið skal taka lut í tí almenna tjakinum um rúsevnismisnýtslu.

Tilboðini sum verða bjóðað rúsevnismisnýtarum í dag, varpa ljós á sjálvan misnýtaran og hjálpir viðkomandi.

Eftirviðgerðin kann fara fram í AA-felagskapinum og tann avvarðandi kann fáa hjálp í øðrum 12 stiga felagsskapum. Felags fyri allar 12 stiga bólkar er, at teir varpa ljós á tann einstaka.

Familjan verður oftani gloymd og sleppur ikki uppí part. Tað er ein sannroynd, at tað er ikki nokk bert at hjálpa rúsevnismisnýtaranum, familjan má eisini hava hjálp, um misnýtarin áhaldandi skal verða rúsfríur.

Heilbrigdi hevur fyri langari tíð síðani ásannað, at okkurt má gerast fyri tey avvarðandi. Tá íð tað sýnist sum um, at tað ikki er politiskur vilji til at hjálpa hesum fólkum, er stig tikið til hetta áhugafelag.

Áhugafelagið kann vónandi hjálpa nakað um støðuna og kann verða við til at varpa ljós á trupulleikar og loysnir.

Hetta er sostatt eitt felag fyri øllum sum hava áhuga í rúsevnistrupulleikum, fakliga, sum misnýtari, sum avvarðandi og sum rúsfríur misnýtari, ja snøgt sagt øll.

Á www.heilbrigdi.fo ber til at síggja uppskot til viðtøkurnar fyri felagið og innbjóðingina til aðalfundin. Eisini ber til at tekna seg til stovnandi aðalfundin ella sum lim á www.heilbrigdi.fo. Tað er ikki neyðugt at tekna seg til aðalfundin, men tað hjálpir okkum við fyrireikingunum, um vit hava eina ábending um hvussu nógv koma. Vit eru eisini at finna á Facebook stuðlafelagið hjá Heilbrigdinum.

Møti fjølment.

Stigtakararnir

Aftur