Suðuroyarkórið 10 ár

Nú sunnudagin eru júst 10 ár liðin, síðan Suðuroyarkórið hevði fyrstu venjing sína. Í hesum sambandi luttekur kórið á møti í Betania í Porkeri, sunnukvøldið kl. 19.

Fyrsta venjingin var í Betania í Porkeri tann 5. februar í 2002, og vóru 17 fólk til hesa venjing. Tað var John í Skemmuni í Porkeri, ið tók stig til at stovna kórið, og hevur hann verið kórleiðari síðan tá.

Fyrstu sangirnir, ið kórið sang, vóru: ”Mín hirði góður”, ”Tørvandi náði” og ”Kanaansland”. Fyrstu ferð kórið sang alment, var til møti í Bethel í Vági, skírisdag, tann 28. mars sama ár. Síðan luttók kórið eisini á samfelagsmøtunum í skúlahøllini í Hvalba tann 31. mars og 1. apríl. Á samfelagsfundunum í Vági á hvítusunnu sama ár, sang kórið saman við Ebenezerekórinum.

Síðan tá hevur kórið sungið til nógv møtir og tiltøk í Suðuroynni.

Kórið hevur eisini havt sangtiltøk í Roynhøllini í Hvalba, skúlahøllini á Tvøroyri, Skúladeplinum í Hovi, í Porkeris skúla, í VB høllini í Vági og í bygdarhúsinum í Sumba. Eisini hevur kórið verið fleiri túrar norðanfjørðs, har sungið hevur verið í ymiskum samkomum, eins og kórið hevur verið við í felagskóri á samfelagsfundum í Havnini nakrar ferðir.

Sangstílurin hjá Suðuroyarkórinum er fjølbroyttur. Fleiri av sangunum verða sungnir saman við solorøddum. Flestu sangirnir verða sungnir saman við klaveri og bassguitari. Onkur einstakur sangur verður sungin  uttan ljóðføri.

Í dag eru uml. 30 fólk í kórinum, sum koma úr teimum ymisku brøðrasamkomunum í oynni. Vant verður hvørt mánakvøld.
 

Aftur