Tórsteini Grækarissyni Madsen til minnis

Nógv er at minnast aftur á, eftir at dagarnir hjá góða vinmanni og skyldmanni mínum, Tórsteini hjá Grækarisi, vóru taldir - og teir vóru nógvir í tali. Hann bleiv 93 ára gamal. Gott hevði hann í at bregða  - pápi hansara, Grækaris bleiv 92 ár.

Tá hugsað verður umTórstein, var hann av alra raskastu monnum og eitt arbeiðsgrev burturav, ið nýtti hvørja løtu av langa lívi sínum til at fáa nakað á skafti. Tíðliga fór hann til skips og sigldi í nøkur ár við sluppum og seinni við trolarum. Hann sigldi við Norðbúgvanum, har Hans Pauli Johannesen í Hvannasundi var skipari, øll krígsárini. Tá teir nýggju trolararnir, Nólsoyarpáll og Jóannes Patursson komu, var Tórstein sjálvskrivaður sum ein av manningini. Hann varð verandi við Jóannesi Patursson øll árini, til Kjølbro keypti trolaran í 1950/51, og bæði Hans Pauli og Tórstein fylgdu við norður til Klaksvíkar.

Seinni tá norðoyingar fóru at manna Jóannes Patursson mestsum burturav, fóru Tórstein og eldri bróðir hansara, Arngrím, ið eins væl og Tórstein, var tikin úr leikum, at leita sær aðrar leiðir.

- Tá var Grønlands-útróðurin byrjaður av álvara. - Arngrímur og Tórstein lótu sær smiðja ein stóran seksæring, og við honum troyttu teir útróðrarmiðini í Grønlandi í mong ár og fingu sera væl burturúr - so dugnaligir og ágrýtnir teir vóru. Teirra partur lá so avgjørt ikki eftir!

Tórstein var trúgvur kirkjugangari. Hvønn sunnu- og halgidag sat hann í sínum sessi mannfólkamegin. Hann hevði eisini verið deknur í mong ár.

Vit báðir Tórstein, Tummas bróðir, Jákup svágur og pápi, Hanus í Kollinum, ið var trímenningur Grækaris - pápa Tórstein - vóru nábúgvar og grannar. Vit hittust so at siga hvønn dag og vardu hvør av øðrum.

Tøkk fyri tær mongu hugnaligu løturnar, vit høvdu saman í Kvívík. Tær ríka minnini og verða ikki gloymdar.

Nógvir dagar eru lidnir, síðan vit búleikaðust handaru megin Toftaránna. Nú er eingin eftir av teimum. Forgeingiligleikin stendur við. Hesin vakri og prúði maður er nú farin, mettur av døgum, heim til síni.

Góða Mimmi og børn tykkara. Minnini góð eiga tit.

Hvíl í friði, góði Tórstein.

Ívar

Aftur