Vælkomin í skúla!

Harmiligt er tað, at námsfrøðingar mugu í verkfall fyri at verða vird - men upp aftur harmiligari er tað, at tað fyri summi nústaðni nú verður kunnugt, hvussu týðandi hesin fakbólkur kann vera innan skúlans gátt.

Innskriving hevur júst verið, og tað er við gleði, at nýggir næmingar verða bodnir vælkomnir í skúlan. Tíbetur hevur lítil skúli lætt samskifti við komandi næmingarnar, og lætt er at fyrireika skúlavitjanir, meðan bíðað verður eftir skipaðum viðurskiftum í gongdini inn í innskúlingarpartin.

Nólsoyar skúli hevði sera gott og mennandi samstarv við námsfrøðing skúlaárini 2009/2010 og 2010/2011. Tíanverri broyttust umstøðurnar hetta skúlaárið, soleiðis at tímar ikki strektu til at fáa námsfrøðingar at søkja starv í skúlanum.

Eins og við verkfallinum, ið nú hevur við sær, at nógv frætta um námsfrøðiliga týdningin, so hevur hetta skúlaárið reiðiliga mint næmingar, foreldur og starvsfólk á vinningin í tvørfakliga samstarvinum - og harvið stóra missin okkum er fyri. Talan er ikki bert um at stuðla nýggju næmingunum, men eisini at tryggja øðrum stuðul, tá ið á stendur.

Tó at avvarandi myndugleikar eru kunnaðir um støðuna eins væl teir eru kunnaðir um nógvar "síðu-vinningarnar", so er tað heilt ómetaliga tungt at fáa hendur á neyðuga tímatalinum, soleiðis at námsfrøðingur starvast á jøvnum føti við læraran innan skúlans gátt. Ivasamt er hvør orðing skal til, soleiðis at skilligt er, at tvørfakliga samstarvið á jøvnum føti er "win-win"-støða.

Vónandi hevur hetta verkfallið við sær, at fyrireikingartíðin eisini verður vird hjá námsfrøðingunum, ið starvast innan skúlans gátt. Tó at námsfrøðingurin ikki stendur fyri undirvísingini, hevur námsfrøðingurin alstóran týdning, bæði tá ið talan er um inklusión og eksklusión - fyri næmingin við stuðulstímum, eins væl og týdning fyri hinar næmingarnar í flokkinum/bólkinum.

"Skúlin fyri øll". "Smáir skúlar eru dýrir". "400 næmingar eru kannaðir". "Játtanin til serøkið er ov lítil". ...nógv hugtøk verða slongd út, tá ið fólkaskúlin verður umrøddur - serliga, um fólk, ið ikki hava beinleiðis tilknýti til skúlan, taka orðið. Eingin orðing einsamøll lýsir avbjóðingarnar innan skúlans gátt - tí ein áseting er: Undirvísingin skal vera næmingalagað!

Góðu næmingar og foreldur. Væl komin í skúla! Vónin er, at samfelag okkara skilir týdningin, tørvin og vinningin, við at námsfrøðingar og lærarar samstarva tvørfakliga um næmingarnar, soleiðis at eisini næmingunum við stuðulstørvi verður tryggjað næmingalagað undirvísing! P.s. hetta krevur samstarv og fyrireiking!

Jákup av Skarði
Fyrstilærari í Nólsoyar skúla

Aftur