Viðmerking til D. J. Jacobsen, viðmerkjara

Normalt plagi eg ikki at kommentera kjallaraviðmerkingar, men ein kommentator, harra D. J. Jacobsen hevur uppiborið eitt svar, tí hann vísir á tvey faktuell mál, og aðrari viðmerkingini hevur hann helst rætt, meðan hann heilt mistekur seg í hinari.

Ad 1) Tað fyrsta er, at hann sigur meg ikki skilja nóg hvast millum OFML og so kommunistaflokkin, og tað er rætt, at tær báðar fraktiónirnar vóru formelt ymiskar, men tað vóru avgjørt ikki vatntøtt skott ímillum, og fleiri vóru Tordenskjolds soldatar, men eg havi eisini ofta havt strævið við at skilja millum  kringlumeinigheitina og pinsameingheitina, tí har vóru nógvir, sum líka sum hjá marxistunum slongdust ímillum. Men eg eri altíð fegin um rættleiðingar.

Ad 2) At D.P. Danielsen ikki var høgravendur, meðan hann saman við Hanusi Høgadalsá umboðaði Tjódveldisflokkin, verdur ringt at prógva, tí bæði J.H. Danbjørg og Petur Mohr Dam stríddust fyri at fáa teir at arbeiða fyri at varðveita t.d.Landshandilin og fyri hjálp til neyðstøddar arbeiðararfyritøkur, men bæði DPD og Hanus við Høgadalsá valdu at sorla hesi sosialistisku tiltøk við hjálp frá Fólka- og Sambandsflokkinum. Hetta minnist eg væl, men tað ger kommentatorurin ikki!

Bæði Villi Sørensen og aðrir av mínum partamonnum  roknaðu tí DPD fyri at vera ekstremt høgraorienteraðan, sum eisini teir flestu tjóðveldismenn reelt vóru. At teir so seinni sum opportunistar fóru at fríggja við Fiskimannafelagnum og gjørdust "oh, so sosialir" er eitt heilt annað mál, sum hevur við taktikk at gera. Men tøkk fyri at eg fekk høvi  til at fortelja um, hvussu kyniskt tjóðveldisflokkurin svavdi Landshandilin á tingi. Hann var annars hjá smáfólki tann mest prísnivellerandi mekanisma, sum vit høvdu í Føroyum.

Virgar T. Dalsgaard

Les eisini:

Ummæli: Ætlaðu eina diktatoriska valdtøku av tí føroyska samfelagnum

Aftur